Est 8 | KYG | STEP | Ani afina'mo Kini vekamo Sekisi'a Yu vaya'ai kame'apimo Hemani no'amogi kagemi ya'amogi alino Kuvini a kanomo Esata'mo ami'niye. Esata'a kini vekae'mo, Motekai'e nagae'e'mo magoke kolatala'mo mai'no'ae, huno ha pai'niya'mofe'mo Motekai'a kini vekamo aulagale'mo eno he ti'niye.

Esther 8

Kini vekamo'a Yu vaya'aife'mo utapa kame vayatapi'e'mo kame hiyo, huno hapa pai'niya gemae

1 Ani afina'mo Kini vekamo Sekisi'a Yu vaya'ai kame'apimo Hemani no'amogi kagemi ya'amogi alino Kuvini a kanomo Esata'mo ami'niye. Esata'a kini vekae'mo, Motekai'e nagae'e'mo magoke kolatala'mo mai'no'ae, huno ha pai'niya'mofe'mo Motekai'a kini vekamo aulagale'mo eno he ti'niye. 2 Kini vekamo'a hogoteno Hemani ayateti'mo asagi'niya linimo alino agai'a ayate'mo vaigeno halate asagino Motekai ayate'mo vaino ate'niye. Ani linile'mo kini vekamo alagena ya'amo hane'niye. Esata'a Motekai'mo lekana paino ate'nigeno muki Hemani kagemi yate'mo yagai'niye.

3 Inagi halate Esata'a uno kini vekamo aiyafi'mo ago'ya faino mai'neno avi'ya'mo nehuno'ae'mo kini vekae'mo, Kanalenageka Hemani'a Yu vaya'mogitalegamo hisiya hosu kavafe'mo hu male'niya gelefe'mo muki vaya'aife'mo, Yu vaya'aitegamo ani agufa kava'mo osiyo, huka hapa paiyo, huno ha pai'niye. 4 Ha pai'nigeno kini vekamo'a aipafi'mo he, kanalene, huno agesamo afiteno'ae'mo goli hayopa kayoteti'mo alino ako'ya huno lekana paino ate'nigeno Esata'a kini vekamo aulagale'mo he tino mai'niye. 5 He tino mai'neno'ae'mo, Kini vekae, kagaemo kahau'nisiya'mo'mo nagaefe'mo kahau'ninageka nagaemo hu'nova gee'mo kanalene, huka kagesamo afi'nisana'mo'mo Hemani'a hogoteno hu male'niya gemo aeka kalo paesanafe'mo ge huka atalegeno muki vaya'aitegamo uneno hisige'a afite'a Hemani'a hu male'niya gemo akame osiyo. Hemani'a avo'mo kae male'niya gemo'mo muki kagaemo ne'yagaina kote'mo mai'naya Yu vaya'aife'mo, apaitapa hano hutapa apataleyo, huno avo'mo kae male'niye. 6 Nagae vaya'aitegamo ani agufa hanageke ya'mo afole aisige'na agete'nae'mo haiya kava hu'na alagepa hu'na maiguve. Magoke kola'mo naipeleti'mo apaisage'a falisage'nae'mo nagaemo haiya agufa kava'mo hu'na alagepa hu'na maiguve, huno ha pai'niye.

7 Kini vekamo Sekisi'a kuvini a kanomo Esata'e Yu vekamo Motekai'efe'mo, Afi'ao, huno, Hemani'a Yu vaya'mo lapaino hano hisiyafe'mo hu'niya'mofe'mo nagaemo ago ane'mu ae'na asai'nove. Asaite'na muki ya'amo ago ali'na Esata'mo ami'nove. 8 Lanakaitanige'mo Yu vaya'mo hapa maesiya agufa avo'mo lanahau'nisiya gemo hutana kaetetana nagae nagimo afa'a kaetetana linileti'mo alitana alagena ya'nimo ani avote'mo hu male'ao. Mago avote'mo nagae nagimo haneteno alagena ya'nimo hane'nisige'a agete'apae'mo magoke vekamo'a afa'a aeno kalo paeno o'atalegaiye.

9 Inagi ani kava'mo hisayafe'mo tuveti tali afina'mo tali kaimo agi'amo Sivani kaile'mo ani kafugafi'mo Motekai'a kini vekamo avo'amo nekaya vaya'aife'mo ge hige'a e'nae. Agaemo mago gemo hapa pai'nige'a ani gemo avo'mo kae'nae. Ani avo'mo kae'a atalageno Yu vaya'aitegagi muki kotega polovenisifi'mo ne'yagaiya vaya'aitegagi hogote gamani vaya'aitegagi kini nofi vaya'mo ne'yagaiya vaya'aitegagi vani hataleti tuveti seveni'a polovenisi kote'mogi huno uneno huteno Itiya koteti'mo aepa faiteno uno Itiyopiya kotegamogi huno uneno hu'niye. Ani avo'mo Yu gefati'mo kaege alu kote alu kote'mo mai'naya vaya'ai apake'apifati apake'apifati'mo kaege hu'a avo'mo kae'nae. 10 Motekai'a, ani avote'mo kini vekamo agi'amo avo'mo kaege lini'aleti'mo alagena ya'amo huge hiyo, huno hapa pai'nige'a ani kava'mo hu maletageno avo'mo ali'ni'a ne'vaya vaya'aina alino apami'nige'a kini vekamo lafi kegi'yafati'mo u'a lusi kava hu'a nagu nagu hu'a ne'vaya hosimo apavaleli e'a ani hosile'mo fai maite'a malage hu'a alini'a muki haopalegamo u'e'a hu'nae. 11 Ani avo'mo'a huno'ae'mo, Kini vekamo'a muki taoni'afi'mo mai'naya Yu vaya'mogitapamo afiyo, huno, lapakaemogi a'netapimogi mafa'netapimogi hu'a naipeleti'mo lapaigefe'mo hisaya vaya'mo anona'apilefe'mo lapakaemo kame hutapa apategae. Kame hisayafe'mo haiya vaya'mogimofi alu kotega mai'naya vaya'mogi'e'mofi hutapa kame hutetapa apaitapa hano hutaletapae'mo muki kagemi ya'apimo afa'a aligae, huno hapa pai'niye. 12 Kini vekamo Sekisi'a yagaino ne'apateya kote'mo ani kava'mo tetini afina'mo tuolofu kaimo agi'amo A'na kaile'mo Yu vaya'mogimo alo hu'a mai'ne'apae'mo kame hisayafe'mo lekana pai male'niye. 13 Ani gemo muki kotega hapa paige muki vaya'aife'mo hapa paige hutapa hapa paiyo. 14 Avo'mo alini'a ne'vaya vaya'mo hosile'mo hai'a fai mai'ne'a malage hu'a alini'a nagu nagu hu'a u'nae. Kini vekamo'a viyo, huno hu'niya gemo'mo huno'ae'mo, malagene, huno hu'nige'apae'mo nagu nagu hu'a alini'a u'nae. Ani kava hu'a alopa taonimo Susa taonifi'mo gamani yafa lafi kegi'yafi'e'mo ani gemo hapa pai'nae.

15 Apakaemo kini vekamo'a ne'vaiya agufa kukenamo yaveyave ya'amo hanege oko ya'amo hanege huno hane'niya kukenamo ali'a Motekai'mo vai'a atete'apae'mo mago haesa lavolavomo yatala lavolavomo ali'a kofi'a ate'nae. Inagi mago kini kakolitamo alopa goli kakolitamo ali'a agenopale'mo male'a ate'nageno Motekai'a kini vekamo ataleno lami'niye. Susa taonifi'mo mai'naya vaya'mogimo agete'apae'mo lusi kava hu'a amuse hu'a atete'a apamogaga ai'nae. 16 U'nige'apae'mo muki Yu vaya'mogi apaipamo'mo lusi kava huno kanale hu'nigeno apaipamo'mo falu hu'nige'a mai'nae. Muki vaya'mogimo Yu vaya'aife'mo ala apaki'apimo apami'nae. 17 Muki kotega'e taonifi'e'mo mai'naya Yu vaya'mogimo kini vekamo'a hu'niya gemo afite'apae'mo mago afina'mo lekana pai malete'a alopa yagita hu'a ne'a apamogaga ai'a mai'nae. Muki mago alu asole vaya'mogimo Yu vaya'aife'mo koli'apimo hute'apae'mo Yu vaya'age'mo ha male'nae.